قرار الزواج ، اهم قرار ، مستقبلك ، حياتك ، نفسك ، جاهز للجواز ،
قرار الجواز هو اهم قرار هاتاخده فى حياتك، بيترتب عليه جزء كبير من مستقبلك او لحسن الحظ لبقية حياتك
هايترتب عليه بناء العيلة اللى انت بتتمناها
هاتترتب عليه حياتك العاطفية، والاجتماعية، والمادية، و...
قرار زى دا لازم تكون متأكد منه ومستريح له تماما
التأكد هنا مش شرط يكون دليل ملموس، ممكن جدا وغالبا بيكون إحساسك الشخصى بغض النظر عن اى حاجة او ظروف تانية
وعلشان تقدر تتأكد ممكن تسأل نفسك شوية اسئلة، انا قدرت اجمع 15 سؤال، لو انت لقيت اسئلة تانية اسئلها
المهم انك تكون صريح مع نفسك لأقصى درجة، مش هاينفع تضحك على نفسك وماينفعش تجمل الحقيقة لنفسك تحت اى ظرف
1 هل انت جاهز للجواز؟
كتير من الناس بتفكر اذا كانوا جاهزين ماديا ولا لأ وممكن جدا ينسوا يفكروا اذا كانوا جاهزين نفسيا ولا لأ مع انه اهم بكتير
جاهز نفسيا يعنى فاهم المسؤوليات اللى هاتبقى عليك ولا لأ، مهيأ نفسك للتغيير اللى هايحصل ولا فاكر ان كل حاجة بتفضل زى ماهى؟
هل تقدر تتخيل انك تكمل مع نفس شريك/شريكة حياتك لمدة 40 سنة مثلا؟
2 انت بتتجوز ليه؟
سؤال غريب ؟!!
كام واحد اتجوز لمجرد انه يرضى اهلة او صحابه وفى الاخر ماحدش قدر يساعده لما لبس
كام واحد اتجوز لمجرد انه فاكر انه بيكمل نص دينه وفى الاخر لقى نفسه بيفقد النص الاولانى
كام واحده اتجوزت علشان "ظل راجل ولا ظل حيطه" واكتشفت بعد كده ان ظل الحيطه ارحم من ظل راجل غلط
كل الاسباب دى موجوده فى دماغك، ممكن تكون مش ظاهره بس اكيد ليها تأثير كبير على قرارك
فكراذا كنت بتتجوز لمجرد الجواز ولا بجد حسيت انك لقيت نصك التانى؟
3 هل انت متأكد انك تعرف شريك/ شريكة حياتك كويس؟
طبعا مافيش طريقة معينة هاتقدر تعرف بيها كل حاجة
بس على الاقل مايبقاش فيه سؤال نفسك تسأله ومتسألوش وتعرف إجابته بعد الجواز وتزعل
4 هل انت حر فى حياتك؟
حر بمعنى هل انت مستقل فى حياتك، معتمد على نفسك نفسيا وماديا بشكل عام ولا بتضطر تعتمد على شخص/اشخاص معينه لحل مشاكلك؟
5 هل انت حر فى إختيارك؟
بتختلف حياة وظروف كل شخص عن شخص، ممكن شخص يبقى عنده ظروف مادية/ إجتماعية/ عاطفية/ جنسية/ نفسية/ .... تخليه ياخد قرار الجواز للهرب من الضغوط دى، بس الحقيقة ان دا حتى مش هروب، دا إستسلام لغاية ما يجى عليك الوقت ويبقى مضطر انه ياخد قرارات مصيرية فى وقت هو مش جاهز فيه
6 هل شريك/ شريكة حياتك حرة فى حياتها وقراراتها؟
لو انت مستقل فى حياتك مثلا، هايبقى صعب شوية انك تعيش مع واحده مثلا بتاخد كل كلامها من اصحابها او اهلها
لازم تعرف درجة إستقلالية الشخص اللى المفروض تكمل معاه بقية حياتك وتشوف اذا كان دا متناسب معاك ولا لأ
7 ايه هو الحلم/الهدف المشترك بينكم؟
اكيد انت عندك حلم او هدف عايز توصله او حتى شكل حياة عايز تعيشها، وانت حسيت ان الشخص دا هو/هى انسب واحد(ه) لتحقيق حلمك
ناس كتير بتفترض انهم عارفين احلام الطرف التانى من غير مايتأكدوا، فبالتالى بيفترضوا ان الطرف التانى كمان عارف احلامهم
هل انت شاركت حلمك مع الطرف التانى؟ هل عرفت حلمهم؟ هل اتفقتوا على حلم يناسبكوا انتوا الاتنين؟ اتفقتوا على الطريق اللى هاتمشوه مع بعض؟
8 ايه نقط الاتفاق والاختلاف بينكم؟
ايه اللى انتوا متفقين عليه، وهاتعملوه ازاى؟
ايه هى اللى الاختلافات بينكم، هل بتكملكوا ولا بتبعدكوا؟ هاتقدروا تعيشوا بيها ولا اتفقتوا هاتغيروها ازاى؟
9 ايه مبدأ الخلاف بينكم؟
لما بتحاولوا تحلوا مشكلة مع بعضن هل لازم رأى ينتصر على رأى، ولا بتحاولوا دايما توصلوا لحلول ترضيكوا انتوا الاتنين؟
مبدا المنافسه يعنى لازم يبقى فيه كسبان وخسران يعنى بيلغى مبدأ المشاركة فى الجواز
10 هل هاتقدروا تكملوا الجواز لو ما خلفتوش؟
حالات التأخر او عدم الانجاب موجوده وبتحصل كتير، ومابتتعرفش عادة الا بعد الجواز، هل لو دا حصل هاتفضل سعيد برضه فى حياتك مع شريك(ة) حياتك؟
بالرغم من ان الاولاد نعمة وسبب من اسباب السعادة، الا ان فيه ناس مقتنعه ان حتى لو ربنا ما ارادش ، فمجرد وجودهم فى حياة بعض سبب كافى جدا للسعادة
11 بتتعاملوا مع بعض ازاى؟
- هل بتبقى على طبيعتك وانت معاه، ولا بتضطر تقول او تعمل حاجات لمجرد ترضيه؟
- هل الطرف التانى بيبقى على طبيعته وهو معاك؟ ولا بيضطر يقول او يعمل حاجات لمجرد انه يرضيك؟
- هل هو متقبلك على طبيعتك ولا دايما عايز يغير فيك اكتر من اللازم؟
- هل انت متقبله على طبيعته ولا دايما عايز تغير فيه اكتر من اللازم؟
12 داخل الجواز عشان تجمع منه ولا معاه؟
انت بتتجوز علشان تجمع فلوس، منصب، مركز إجتماعى، ....
ولا بتتجوز علشان تجمع معاه ذكريات حلوة وتبنى معاه حياة احلى
بعد ماتجاوب، اسأل نفسم هو الطرف التانى بيتجوزك ليه، فيه سبب معين ولا لنفس اسبابك؟
13 شايفين بعض ازاى؟
هل انت شايفها عروسه مناسبة او انتى شايفاه عريس مناسب؟
العريس او العروسه شغلتهم انهم يجهزوا نفسهم للفرح
كل تفكيرهم ازاى يتشيكوا ويتزوقوا علشان يجهزوا نفسهم لما الناس تشوفهم
بعد الفرح ماباقش هو عريس لا هى عروسة
هايبقوا 2 بنى اّدمين على طبيعتهم
يبقى ماينفعش تدوروا على "عروسة" مناسبة او "عريس" مناسب، دور على الشخص اللى بيكملك مش اللى بيجملك قدام الناس
14 هل انت تستاهل احسن من كده؟
ناس كتير بتبقى مخلصه فى حبها للطرف التانى بس الطرف التانى مش مقدر الاخلاص والحب دا وبيتعامل معاهم على انهم واجبات مش حاجة انت بتعملها علشان انت عايز كده، ولو دى الحالة يبقى طبيعى ان الطرف التانى مش هايبادلك نفس الشعور
السؤال هنا: هل انت مستعد انك تكمل بقية حياتك مع شخص مابيعاملكش زى ماتستحق وشايف انك تستحق احسن من كده؟
ماتقللش من قدر نفسك علشان خاطر حد
15 مرتاح للقرار؟
غريزتك هى احسن حد فى الدنيا يديك النصيحة
صدق نفسك وصدق غريزتك لأن هى الصح
ماتاخدش اى قرار وانت مش مرتاحله
فى الاخر دى كلها تجارب إنسانية، مافيش صح مطلق ولا غلط مطلق .. كل حاجة نسبية من وجهة نظر كل واحد
شوف ايه اللى يقدر يفيدك فى حياتك فعلا واعمله، ممكن كل حاجة تبقى غير منطقية والجواز يمشى زى الفل وممكن كل حاجة بتقول انه هايبقى جواز ناجح ويفشل فى وقت قصير جدا